Н.ЖАНТӨРИН АТЫНДАҒЫ
МАҢҒЫСТАУ ОБЛЫСТЫҚ
МУЗЫКАЛЫҚ ДРАМА ТЕАТРЫ
ХХ ЖЫЛ

Атырау қаласындағы гастрольдік сапарымыз өз мәресіне жетті

Қараша айының 10 мен 13-і аралығында үш күнге созылған Атырау қаласындағы гастрольдік сапарымыз өз мәресіне жетті. Бұл күндер біз үшін де, көрермендер үшін де ерекше әсерге толы, рухани мереке іспетті болды. Қала тұрғындары мен қонақтары театр өнерінің құдіретін сезініп, әр қойылымнан кейін ыстық ықыластарын білдіріп, ұзақ қол соғып қошемет көрсетті.

Біздің ұжым бұл сапарда түрлі жас ерекшелігіне арналған бірнеше қойылымды сахнаға алып шықты. Күндізгі уақытта бүлдіршіндерге арналған «Арыстан патша» атты ертегі қойылымы ұсынылды. Балалар үшін арнайы дайындалған бұл туынды кішкентай көрермендердің қиялын тербеп, олардың бойында мейірім мен батылдық, адалдық пен достық секілді ізгі қасиеттерді ұялатуға бағытталды.

Ал кешкісін атыраулық өнерсүйер қауымға қазақ әдебиетінің інжу-маржандары негізінде қойылған бірқатар әсерлі спектакльдер ұсынылды. Солардың бірі — ұлы жазушы Әбіш Кекілбайұлының «Шыңырау» шығармасы. Бұл қойылым көрермендерді адамдық ар мен намыс, рух пен сана биігіне жетелеп, терең ойға қалдырды. Сондай-ақ, қазақ поэзиясының қос алыбы — Фариза мен Мұқағали арасындағы рухани үндестік пен шығармашылық байланысқа арналған көріністер де көпшіліктің жүрегінен орын алды.

Жастар мен студенттер қауымы үшін «Ғашықпын саған» атты романтикалық драма сахналанып, жас жүректерге махаббат пен арманның, үміт пен сенімнің қадірін ұқтырды. Ал ұлт тарихына арналған «Әлиханның аманаты» атты қойылым – қазақ халқының тәуелсіздік жолындағы күресін, ұлт көсемі Әлихан Бөкейханның өмірі мен ұлы мұратын бейнелеп, көрермендерді елдік пен ерлік рухына бөлеп шықты.

Бұл гастрольдік сапар біздің шығармашылық ұжым үшін үлкен тәжірибе мен шабыт сыйлады. Атырау қаласының көрермендері ерекше ықылас танытып, өнерге деген сүйіспеншілігін білдірді. Біз олардың жылы қабылдауын, ықыласты қошеметін жоғары бағалаймыз.

Әр көрерменнің жүзіндегі күлкі мен жүрегіндегі әсер — біздің ең үлкен жетістігіміз.
Атырау халқының ықыласы мен қошеметі біздің болашақтағы жаңа шығармашылық ізденістерімізге қуат берді.